وَأُخفِي عَنكَ شيئاً ليسَ يُحكَى فأصمتُ ثُمَّ تَفضَحُنِي عُيُونِي , ألَا يَا عينُ كنتِ الأمسَ أوفَى فَمَن عَلَّمَكِ سِرَّاً أن تَخُونِي ♥

 HD: https://www.behance.net/gallery/73943357/he-she

يارب ي كريم اللي فيا ميتحكيش
ساعات بغلط واقول ياريت مخلقتنيش
وازاي الانسان يعيش
من غير احباب ضهر وسند
عدي بيا العمر وانا كتفي علي مفيش!
بيشوي رفعت 🙋🏻‍♂

جابني الحنين

جابنى الحنين
كان نفسي اقول كل اللي مقلتوش
وتعب السنين
وكل شى في الاخر طلع فاشوش
كان نفسي اقولك كتير بحبك
وانى جايلك
فى الصباح الباكر
وانى لسه فاكر
كل الوعود وعمرى ما نستها
وان انتى اجمل واحده حبتها
انا لسه باقى على حبنا
 على اللى فاضل مننا
ازاى هكمل وانتى مش هنا
وردت عليا
كل الحاجات فات وقتها
وكل شى فات وانتهى
كفايه انك نسيتنى
عمرك ما حبيت
ولا حتى حبتنى
وانا اللي جاى
اقول وحشتيني

#بحبه

بحبه..

وأخاف علي زعله..

وأداري

رغم بروده

وحُرقة ناري

رغم تجاهله المتعمد

وكل ما أقرب منه بيبعد

ورغم دموعي ما فارقت خدي

وبرغم ما بيظهر وبيبدي

رغم بعاده عني وهجره

لكني بحبه

أيوة سقاني المر بكاسه

أيوة قلبه عمره ما رق

ولو تسأله عن إحساسه

عن الأموات ما في فرق

أيوة عناده مقسي قلبه

لكني بحبه

لما يزعق فيا ويشخط

وعفاريته حواليه تتنطط

لما بيسرح عقله وفكره

ساعتها بحبه

قالي ف يوم:لازم نبعد

ويوميها كنت أنا بعند

ومينفعش إني أبعد عنه

أصلي بحبه

ياما الحب جه بمشاكله

لوع ناسه وفرق أهله

روح يا حب قوام وإندهله

قوله بحبه

يا كل واحد قلبه داب

وعاش ف مرار وقاسي عذاب

أمانة إنتوا والأحباب

الكل يقوله:

والله بحبه

3-12-2018

قالت لي!

قالت لي
الحب ملوش تمن
لما افكر انك بعيد عني
ببقي في احتياج لكفن
ايه يعني ابويا غني
وانت فقير الحال
يكفي غني نفسك
وكرمتك واني بحبك
وعايزك علي اي حال
يكفيني من الدنيا
جحر صغير
يكفيني حبك اللي
لابيتبدل ولايتغير❤

#أحلام وردية

أنا لما أكبر هبقي وأكون

ظابط صيته يملي الكون

كبير وصغير بيهابه

يملي مكانه فين مايكون

لأ

أنا عاوز أكبر وأصير

راجل عنده علم غزير

وطريقه مقصد للناس

صاحب قلب وعقل كبير

لأ

أنا هكبر وهكون فنان

كل حياته رسم وألوان

وفرشة يحدد بيها طريقه

وخياله يطلقله عنان

لأ

لما أكبر هبقي دكتور

وبعلمي هبقي مشهور

وأعالج بيه كل الناس

وطريقي هيشوف النور

أحلامي الوردية معايا

من صغري وكمان ف صبايا

خلتني أحلم وأتخيل

وأطلق كبت كان جوايا

12-9-2017

#محمد

#كوافير

الحلاق إتغير إسمه

صار إسمه قال إيه كوافير

إيه رأيك ف القصة ياهانم؟

دي تجنن..شكلها خطير

ليه كل الصلاحية يحسس

ع الشعر..متسرحش بعيد

يغسل أو يشطف ويقصقص

كل زيارة ب(لوك)جديد

أصل الباشا ياناس دكتور

من جامعة(بيير كاردان)

ويا دراسته صار مشهور

من كتر م صاحب نسوان

تيجي القطة تقص وتصبغ

يطلع بالتليفون طوالي

عنده القدرة يكلم دسته

ومزاجه دايما ف العالي

يقدر يشبكهم من نظرة

وتملي دايبين ف غرامه

لما يسبل مرة بعينه

تلاقيهم ساحوا قدامه

لو تسمع أخباره تلاقي

حياته مليانة بلاوي

عمره ما بيسمع لنصيحة

وع التوبة هو مش ناوي

27-4-2019

#محمد

فضفضة3

أنا المغلوب علي أمره

صاحب الضحكة الحزينة

أنا اللي الدنيا بتذله

والفرحة جواه سجينة

بعيش ع الذكري والماضي

بموت ف الساعة100مرة

بذّل ف نفسي من جوة

عزيز الشأن من برة

تشوفني تقول ف أحسن حال

وحالي عمره مايسرك

أسير للذكري والأطلال

حنيني عمره مايهمك

تبص عليا من برة

تلاقي فرحة الدنيا

تقرب مني تلقاني

كئيب والفرحة مطفية

28-4-2019

فضفضة2

مش عاوز أكون أكبر شاعر

ولا عاوز أكون حتي مشهور

أنا واحد جوايا مشاعر

مستنيا تطلع للنور

أحلامي بسيطة وعادية

مش عاوز فيلا وعربية

أنا عاوز أشخاص تفهمني

تساعدني وتاخد بإيديا

6-2-2019

فضفضة1

أنا الطفل اللي كان نفسه يكون دكتور

أنا الحلم اللي كان عاوز يشوف النور

أنا الأيام اللي بتتعاش بدون رغبة

أنا مستقبل الفقرا اللي كله خوف ورهبة

أنا حسب الوصف تلقاني

أنا العاشق الولهان

اللي بتقتلني أشجاني

أنا كل حاجة وولا حاجة

أنا الكلمة اللي محبوسة ومحتاجة

لناس تسمع

4-2-2019

ع الكورنيش

وف ليلة من ليالي الصيف

قالتلي يالا نتمشي

ع الكورنيش الجو لطيف

وبعد ما نسهر نتعشي

مسكت إيدي وكانت طايرة

م الفرحة والقلب مرفرف

تطلق ضحكة وليها صداها

كانت حابة الدنيا تعرف

إننا أسعد حبيبين

ومفيش زينا اتنين

ف الدنيا أو أقرب منا

يتقال عنهم عاشقين

وقفت قالت نتصور

ونزود ف حياتنا ذكري

نضحك ونقول يا سلام

لما نصادفها بكرة

درة و حمص

جبنا وكلنا

نوجا وملبس

دايرة حياتنا

كانت سهرة يا خلق جميلة

فيها رسمنا طريق سكتنا

بس قدرنا ماكانش موافق

يجي ويمشي علي مزاجنا

ليه الدنيا شاغلها فرحنا

ليه بتحب نعيش ف جراحنا

سكة بنمشي فيها وليه

مش عاوزة مرة تريحنا

قالتلي:جمبي هتكون

قولتلها:ولآخر العمر

ومعايا فين ما أكون

ما يفرقنا غير القبر

وكانت فعلا هي الكلمة

وكانت ليا أكبر صدمة

قال ويقولك لازم تصبر

دا رحيلها كان طبعا حكمة

إيه الحكمة ف بعدها عني

إيه الحكمة ف ألمي وحزني

وليه دايما هي مش غيرها

يغيظوني ويقولوا قدرها

4-12-2018

كل مر هيمر

ياللي شايل هم بكرة

بكرة جي ف الطريق

مهما كنت ف عز فرحك

ولا كنت ف عز ضيق

بكرة هيعدي بحلاوته

أو بمره يا رفيق

لو تخلي الحزن طبعك

كله يكره قربه منك

كله يبعد عن خطاك

مش هيشيلوا هم حزنك

إنت حزنك إيه أساسه

خلي حزنك دا لناسه

كارهة فرحك شامته فيك

حاطه عينها ع اللي ليك

ولو اللي ليك يبقي ف إيديهم

برضو مش هيحسوا بيك

يبقي كبر إنت مخك

وإبتدي يومك سعيد

يا تري كلامي وصلك

ولا محتاجين نعيد

#محمد

هدف المدونة الأساسي "التعبير"
قول كل اللي جواك بعيد عن السياسة والدين.شاركنا بموهبتك.سمعنا أشعارك.شاركنا قصصك.فصول من روايتك.خواطرك وكتاباتك.كوّن أسرة تستفيد أدبيا وأخلاقيا من بعضها.